莫迪歷今場射入1球及1次助攻。

周二(10日)凌晨世界盃外圍賽歐洲區L組，克羅地亞主場以5比1大勝榜首捷克，39歲隊長莫迪歷射入1球及1次助攻，另外3位「30+」老將卡拉馬歷、比列錫、安迪布迪美亞亦有波入，4人年齡加埋已經141歲，果然寶刀未老。

克羅地亞上場世盃外大炒「魚腩球隊」直布羅陀7蛋，被指有「水份」，今仗遇上賽前3戰全勝嘅捷克，仍然佔盡上風，踢到42分鐘由33歲前鋒卡拉馬歷入波打破缺口。換邊後冇耐，捷克憑中場湯馬士蘇錫克建功扳平，但隊友唔生性，轉個頭被判罰12碼，莫迪歷主射入網，協助克羅地亞再次領先。

其後另1位36歲老將比列錫亦入1球，加上33歲嘅安迪布迪美亞射入12碼，以及卡拉馬歷75分鐘埋齋，個人梅開二度，為克羅地亞大勝5比1完場，2戰2勝。

雖然克羅地亞落後捷克3分，但踢少2場，日後好大機會奪取小組首名直接出線席位。克羅地亞今場4位入波球員，都係33歲或以上，呢支「老人兵團」仍然有心有力。

莫迪歷今夏約滿離開皇馬，以佢今場表現，狀態仍然非常勇猛，《米蘭體育報》指AC米蘭已急不及待，爭取今個星期內同佢簽約，年薪為350萬歐元(約3,130萬港元)。